Av Ketil Tjore,  STRILEN

Idrettsrådet deler kvart år ut sti­pend til idrettsutøvarar, leiarar, trenarar eller idrettslag. Dette året var det langrennsløpar Bjørnar Stusdal frå Nordhord­land skiklubb, og handballtre­nar Ragnhild Tveit Porsmyr frå Knarvik IL, som fekk heider, ære og kvar sin sjekk på 5.000 kroner.

– Stipendet skal stimulera til vidareutvikling og utdan­ning innan idrett og aktivitet, sa Bjørn Ove Myking i samband med utdelinga.

Radværingen Myking er sty­releiar i Hordaland idrettskrets, og delte ut stipenda saman med leiar i Lindås idrettsråd Svein Haukås.

– Kjem godt med
– Stipendet kjem godt med, det kostar ein del å satsa på skiidrett, seier Bjørnar Stusdal.
– Dette motiverer til vidare trening.
Onsdag kom han rett frå trening i lysløypetraseen på Gamlesætra, og til årsmøtet i idrettsrådet der stipenda vart delte ut.
– No bur eg i Åsane, men eg er på Gamlesætra kvar kveld for å gå på ski, seier han.
Stusdal går for Nordhordland skiklubb, og er ein av dei som har løfta aktiviteten i klubben dei siste sesongane, mellom anna med KM-tittelen i stafett. Denne vinteren har han gått renn mest kvar einaste helg.
Ny duell
Stusdal (26) har alle grunnar til å vera god på ski, oppvaksen som han er på garden som husar løypetraseen på Gamlesætra. Men etter å ha utvikla sjukdommen cøliaki (glutenallergi) i oppveksten, gjekk det mange år der han ikkje fekk noko utvikling att for treninga.
– Det gjekk mange år før legane klarte å finna ut at det er cøliaki eg har. Men no har eg fått trena skikkeleg det siste halvanna året, seier han.
– Eg har verkeleg fått gløden tilbake.
Sist helg var han nest best av dei lokale i Birkebeinerrennet, berre Claus Sellevoll gjekk raskare enn Stusdal. Det vert ein ny duell mellom dei to alt søndag, under Strilarennet på Gamlesætra.