Av Ketil Tjore ketil@strilen.no
KNARVIK: Ungdommane var i sentrum då Nordhordland skiklubb hadde premieutdeling.
– Kva som er kjekkast med langrenn? Alt! seier Hedda Aasgård, som torsdag var med på Nordhordland skiklubb si sesongavslutning. Oppunder femti av dei 216 medlemmene var samla i Nordhordlandshallen for å kosa seg med pizza og kaker, og dei yngste fekk applaus og medalje for innsatsen i vinteren som gjekk.
– Eg veit ikkje heilt enno kor god eg skal bli, seier Hedda Aasgård (12). Det ho veit, er at fristil er kjekkare enn klassisk. Der er Maja Totlandsdal (6) heilt samd. – Eg skal verta flinkare enn pappa Jonny, slår Maja fast.
God sesong
Herman T. Alvær (Gutar 11 år) fekk ros for KM-sølvet i klassisk stil, og Magnus-Johan Færø vart trekt fram for si gode utvikling denne vinteren. Færø går andre året på skigymnaset på Geilo, og har konkurrert over heile landet, med gode plasseringar i fleire Norgescuprenn. I tillegg til å konkurrera ute, har det vore kjempebra deltaking på Gamlesætra skicup denne vinteren, ein cup som Eikanger idrettslag arrangerer. Skiklubben hadde ansvaret for Nordhordlandsmeisterskapen (tidlegare Lindåsmeisterskapen) og Strilarennet.
God deltaking
– I Nordhordlandsmeisterskapen nådde me opp i 245 startande, til saman for individuelle renn og stafettar, fortel Atle Austrheim i skiklubben. For Strilerennet 2014 annonserte Claus Sellevoll at det kan komma eit samarbeid med IL Bjørn West, og kanskje rennet går i Stordalen? – Ei løype i Dyrkolbotn er også aktuelt, inn til Instebotn, fortel Sellevoll. Frå den kommande vinteren har skiklubben fått avtale med grunneigarane i Dyrkolbotn, slik at det kan leggast til rette ei løype på ca 3 kilometer rundt vatnet der.
Vann i KM
Også seniorane i klubben har også denne sesongen gjort det bra, i både individuelle renn og i stafettar. KM-stafetten var det Nordhordland skiklubb som vann, med Jo-Harald Færø, Bjørnar Stusdal og Claus Sellevoll på laget. Og i NM-stafetten vart det ein 102. plass med Sindre Sunde, Bjørnar Stusdal og Magnus-Johan Færø på laget. Det var ein god framgang frå 2012, då skiklubben sitt lag vart henta inn att med ein runde og måtte bryta. Og så har leiaren sjølv i klubben, Claus Sellevoll, markert seg fremst mellom dei vaksne denne vinteren. Han har vunne fleire renn, og fekk gode resultat i både Vasaloppet, Birkebeinerrennet og Skarverennet.
Skiklubben står for ekstremløp
KNARVIK: Nordhordland Skiklubb overtok i 2012 arrangøransvaret for Knarvikmila Xtrem, og laga til løp i ei ny rein terrengløype mot Isdal og over Indregardsfjellet. Skiklubben er arrangør også i 2013, og løpsdatoen vert onsdag 21. august. Meir om dette løpet og andre løp i regionen i avisa tysdag 30. april. (Har du eit nytt løp som ikkje vart arrangert i fjor,send ei melding i løpet av helga til ketil@strilen.no)